香港新浪網 MySinaBlog
« 上一篇 | 下一篇 »
kenken | 4th Aug 2008 | 飲飲食食 | (523 Reads)

Picture

今天因有要事放假去中環一趟.早上11時已完成手上事情,另一件要做的事要等到下午3時,返屋企再出來又好似費時失事,所以無無聊聊在中上環走走(詳情請看"視覺.印象;上環點滴")肚子餓了,想起當年係上環工作都冇試過的一些老鋪,咁就去試試吧!

Picture

蘭芳園出名絲絨奶茶,但大熱天時都係叫個凍既,加埋蔥油雞丁,盛惠$38元.先講奶茶,唔知係咪凍飲關係,飲落唔覺得特別出色,甜味蓋過了奶味,雖然飲出有奶茶的"質感"但又唔多.另外有一樣野大家要注意,係舊鋪並不供應"茶冰"(用奶茶結成冰塊混入奶茶中),新鋪才有供應.我在舊鋪食,所以杯凍奶茶就越飲越淡呀!至於蔥油雞丁,其實個size唔係好大,大食者可能呢個餐滿足唔到佢.賣相亦唔係好靚,不過見佢係大排檔起家這點我不太計較.味道如何?我覺得唔係好特別,如果唔鐘意食蔥油的朋友千祈唔好order,因為D蔥油味會蓋過所有食物,不過我記得有一次收音機訪問過老闆,佢話D蔥油係用植物油做,唔會太肥,雖然咁講,但都有小小"滿口油"的感覺.至於雞扒..雪藏貨色,冇雞味law...

Picture

(新鋪外觀,個"蘭"字光管壞左emotion)

至於佢另一"強項" 油多士,當我行入去時見到三個並排的多士爐時,我已決定不試了...

見食完肚子還有空間,不如一不做二不休,去埋"九記牛腩"吧emotion

Picture

Picture

去到未夠十二點,食不到牛腩但就食左個閉門羹.原來九記係十二點半才開門,而且營業時間都幾特別(見上圖).冇計唯有行一轉才回來看看吧!(亦因為噤才有下一段文章)當十二時十五分再回來時,噢!已經有十幾二十人等緊佢開門了.唔係咁誇呀麻!?唉,唯有又再等吧!到差不多開門時間,望一望後面,粗略估計都有三,四十人,而且除了一些老街坊外,日本人,鬼佬,行政人員都係度不怕暑熱係度等,這令我更加期待D牛腩係咪真係咁好食...好了,率之開了,第一時間搵個角落位坐低,同檯還有兩對夫婦,其中一對係年紀較大的街坊."我們久不久會來",七十多歲的老伯繼續說:"以前細個在附近剪髮三毫子;買一碗燒鵝瀨粉五毫子.."另一對中年夫婦就真係第一次黎,想試試如何.大家講講笑笑之中伙計來了,信心大了的我叫了碗舖頭最貴既"清湯爽腩"...

Picture

伙計送來時望一望,$62蚊一客飯碗大的牛腩,相信係我有史以來食最貴的牛腩吧!不過當我食過兩三舊之後,伙計大嚷"爽腩賣光了",當時只是開鋪後十分鐘左右.究竟爽腩是否真的好吃呢?我覺得係挺爽的,而且整碗都係爽腩,不會夾雜其他,至於清湯底,湯其實並不清,但濃厚的味道加上沒有奄過的腩肉,這個配搭不錯不錯...

Picture

(食完出來的的景況,一間小小的食鋪可以做到咁真係好不威風!!)

說到這裡要讚一讚九記的伙計,完全唔駛落單,中途還要用半咸淡日文應付日本姐姐,一樣可以準確送上食物,簡直係佢個人表演般.

今日的總結係:蘭芳園我諗唔會再去了,至於九記...都可以再一試既,其他啦!爽腩真係貴左Demotion


[1]

嘩, 真係啱, 我未睇你呢篇之前諗住聽日lunch time去九記試吓!
不過睇完你寫, 我驚我要等好耐呀!!
都係等weekend先去試吓!

cakecake
[引用] | 作者 cakecake | 4th Aug 2008 | [舉報垃圾留言]

[2] Re: cakecake
cakecake :
嘩, 真係啱, 我未睇你呢篇之前諗住聽日lunch time去九記試吓!不過睇完你寫, 我驚我要等好耐呀!!都係等weekend先去試吓!

聽朋友講九記日日如是,我諗weekend都差不多...
提提妳,等緊時記住企係正門附近(近車路),不要企側門.今日有好多人中招,最後變成等得早卻入得遲.

kenken
[引用] | 作者 kenken | 4th Aug 2008 | [舉報垃圾留言]

[3]

我上次去過九記一次就無去..因為有一次睇左一篇食評(岩岩係我去既同一天)話係碗麵發現有血既膠布..睇完之後我真係唔敢再去.
蘭香園我都係覺得一般啦..反而勝香園既蜜蜜脆就好正啦

JO
[引用] | 作者 JO | 5th Aug 2008 | [舉報垃圾留言]

[4] Re: JO
JO :
我上次去過九記一次就無去..因為有一次睇左一篇食評(岩岩係我去既同一天)話係碗麵發現有血既膠布..睇完之後我真係唔敢再去.蘭香園我都係覺得一般啦..反而勝香園既蜜蜜脆就好正啦

呀~~~居然有D咁既事??係咪真架??如果係就有D可惜,咁出名唔應該犯呢個錯誤...

今日有同事叫我試架央多(小靜也提過)...下次經過蘭芳園有緣的話或者再試下啦.

咁勝香園係邊處呢??

kenken
[引用] | 作者 kenken | 5th Aug 2008 | [舉報垃圾留言]

[5] Re: 小靜

佢D奶茶真係唔突出,就個日杯凍奶茶黎講,我覺得太興既冰鎮奶茶好飲過佢.

蕃茄豬扒蛋通?好唔好食架??通心粉對我黎講只會病左才吃,蕃茄湯底亦唔係我至愛...

三個多士爐放埋一齊令我覺得佢都係流水作業,機械式的工序立時令我唔想食多士,我都覺得自已怪怪呢!

下次如果想去九記可以咁行:從威靈頓街"蓮香樓"側鴨巴甸街直上,轉右入九如坊,直行轉尾上十零級樓梯就見到啦.

我D日文亦老早收了檔..emotion

kenken
[引用] | 作者 kenken | 5th Aug 2008 | [舉報垃圾留言]

[6]

hihi..
我係cakecake的朋友,見到你呢個topic好有趣所以想留下言

蘭芳園, 我只去過佢新鋪,未試過舊的!可能自己幾鍾意蔥油的關係,所以對蔥油雞丁又幾ok wor..

九記,我覺得個湯抵油得滯!去過一兩次就唔再提起興趣!反而對面的勝香園係我的favorite. 不過而家實在太熱,要涼d先去!好慣住佢d番茄牛肉通同脆脆呀!!

水十十月
[引用] | 作者 水十十月 | 5th Aug 2008 | [舉報垃圾留言]

[7] Re: 水十十月
水十十月 : hihi..我係cakecake的朋友,見到你呢個topic好有趣所以想留下言蘭芳園, 我只去過佢新鋪,未試過舊的!可能自己幾鍾意蔥油的關係,所以對蔥油雞丁又幾ok wor..九記,我覺得個湯抵油得滯!去過一兩次就唔再提起興趣!反而對面的勝香園係我的favorite. 不過而家實在太熱,要涼d先去!好慣住佢d番茄牛肉通同脆脆呀!!


首先多謝你的留言emotion經常在cakecake,Jo見過你,對我黎講不陌生了.

蔥油其實我都鐘意,但我覺得混入了即食麵始終冇飯咁正,我還是比較想吃加入蔥油的飯品多D.

可能我第一次試,所以去了舊鋪,或者下次去新鋪,那裡有"茶冰"丫嗎!

哦..對面的大排檔就是勝香園.佢最出名好似係番茄牛通.不過我都講個,番茄+通心粉唔係我至愛...

 那脆脆係乜呢??emotion

kenken
[引用] | 作者 kenken | 5th Aug 2008 | [舉報垃圾留言]

[8]

脆脆係用豬扒包個隻麵包加上牛油同蜜糖烘出的類似多士食品...

希望你明我講乜!! haha..

水十十月
[引用] | 作者 水十十月 | 6th Aug 2008 | [舉報垃圾留言]

[9] Re: 水十十月
水十十月 : 脆脆係用豬扒包個隻麵包加上牛油同蜜糖烘出的類似多士食品...希望你明我講乜!! haha..
唔..照你形容呢個脆脆好似幾好食播!emotion

kenken
[引用] | 作者 kenken | 6th Aug 2008 | [舉報垃圾留言]

[10] Gladys Garza

Chime flick buy testosterone legally chart library? Football simple buy testosterone pellets online ho flung! Axe another steroids side effects for men cost siren. Flower with buy testosterone.


[引用] | 作者 Winstrol | 22nd May 2015 | [舉報垃圾留言]